一田CEO：勝在不捽數 分店一變六 靠小學生道理管理
http://hk.apple.nextmedia.com/financeestate/art/20130709/18328061
一田CEO：勝在不捽數 分店一變六 靠小學生道理管理
莊偉忠一生人打過14份工，他說不會浪費時間在「冇嘢玩」的工作上，履歷比一般人精采。如創辦財務公司「安信兄弟」後高位賣盤，再去馬會捧紅「精英大師」。五年前，他獲新地（016）聯席主席郭炳聯挖角，出任一田百貨CEO。這位非一般上司，說自己致勝關鍵不是夠聰明、夠辣手，而是靠些「小六學生都識的做人道理」。
記者：吳綺慧
莊偉忠用了五年時間，把一田的分店規模由「一間變六間」，生意額升幾倍，商場加盟邀約如雪片紛至，最近更要在短短三個月內連開三間新店，屬近年百貨業少見之舉。說到改革一田的關鍵，莊偉忠卻淡然地說自己「只得兩三招」，都是些「小六學生都明白的基本原則」。例如？當一個通情達理的上司吧。莊偉忠在一田上班的第一天，便決定取消每日的例行早會。
「明明返工時間係9點，個會就8點45分開，（公司）仲唔係想攞人着數？個會又無內容，只係例牌講下手頭上有乜工作咋喎。」結果莊偉忠出席一次後，即宣佈從此取消會議，全場同事立刻歡呼，「呢一刻佢哋知道，我唔係一般的老細。」
減省無謂虛耗 寧做實事
莊偉忠認為，一間企業的致勝關鍵，並非鬥銀彈、鬥捽數，他深信運用父母自幼教落的做人道理去做生意：有禮、誠懇、互信……一樣可以成功。「好簡單，一般公司職員每日花最多時間去做乜呢？檢討啦、俾人鬧啦、互相指責啦、發自己脾氣啦、去開會討論一啲根本無人控制到嘅嘢啦……每日就花40%、50%精力，去搞呢啲不事生產嘅嘢，咁生產力點會高？」
莊偉忠加入一田後，就是要盡量減少這些「無謂的虛耗」，消除部門間多餘的門檻，訂下公司整體策略後，信任並放權予下屬，絕少干預，從不捽數。「做老細就係要發揮下屬所長，而唔係妄想可以控制晒所有嘢，以顯示自己幾咁英明神武，帶領所有人出紅海！我的下屬才幹唔係特別高，但我哋絕不官僚、絕對有效率。你哋只用緊40%、50%時間做實事，我哋就用80%、90%，咁我咪砌低你囉！」
強調現金流好 暫不上市
一田每年的銷售目標，莊偉忠總把數字訂到「有咁低得咁低」，他形容是「可有可無」的程度：「老闆（新地）見到，都會話『乜又set到個數咁鬼低㗎』，但他心裏明白，無論我們寫到個數幾低，其實我們一樣係咁盡力㗎啫！」莊偉忠08年訂下的銷售目標，只是按年升3%，但最後該年生意增長幅度是37%。如是者，老闆亦任由他自由發揮。
生意正值高增長，一田會否考慮上市來體現價值？莊偉忠就斷言否認這可能性：「如果畀我話事就一定唔會，我哋cash flow咁好，又夠出名，上市嚟做乜啫？同埋上咗市，好多事做法唔同㗎啦。」觀乎甚多老牌企業，上市後為交數「捽餐死」，的確不像莊偉忠的作風。但願這些非他所能控制的情況，都不會出現。 |
發表於 2013-7-9 14:56
| 